Umugabo arashinjwa kuruma urutoki rw’umugore we akaruca

Mu Karere ka Musanze haravugwa Umugore witwa Mukandutiye Vestine ushinja umugabo we witwa  Nshimiyimana Jean Claude kumufuhira, kumukubita amabuye mu mutwe agambiriye kumuvutsa ubuzima no kumuruma urutoki akaruca 

Mu Mudugudu wa Akumugeni mu kagari ka Buramira ,mu Murenge wa Kimonyi, mu Karere ka Musanze umugabo arashinjwa kuruma urutoki rw’umugore we akaruca, kumufuhira no kumukubita amabuye mu mutwe .

Inkuru dukesha Radio/ TV1 ivuga ko Mukandutiye yahohotewe bitewe nuko umugabo yamubonanye n’undi mugabo maze akamufuhira. Uyu mugore avuga ko ngo bari bavuye mu bukwe ariko umugabo aramurakarira kubera ko ngo yamubonanye n’undi mugabo maze amuruma urutoki n’amenyo.

Uyu muturage avuga ko nyuma  yaho amurumiye urutoki kuwa kane w’icyumweru gishize tariki 29 Kamena 2023, nabwo yamukubise amuziza ko amubonanye n’undi mugabo.

Agira ati: “Naraje ntambikana na muramu we wari kuza, nkaho yakageze hano duhita dukumirana mu nzira,ati uwo wari kumwe na we ni umugabo wawe,muvuye he? Ndavuga ngo ko ari wowe nari nje kureba ,uyu nirirwanye na we muri kabare,(avuga akabari) ubajije abanyakabare bose bo mu Mudugudu bakubwira ko nigeze mpurira na we muri kabare? Umuhungu nibwo yahise yigendera, niko guhita amfata gutya akankubita,akangira gutya.”

Akomeza agira ati “Yarandyamishije hasi,akajya afata amabuye akayankubita mu mutwe. Ngo narananiranye, ngo ndi igishushwe, wenda n’abaturage bazavuge niba hari umugabo bari bambonanye.”

Abaturanyi b’uyu mugore bavuga ko amaze igihe kinini ahohoterwa bityo ko hagira igikorwa atarahasiga ubuzima.

Umwe yagize ati “Ndi umuturanyi we wa hafi dore ntuye aha ariko sinshobora kumara icyumweru ntumvise umudamu ari mu nzu ari kurira, umugabo yamunigiye mu nzu,umugabo we arakinga, abantu bakaza bagahonda inzugi,basahaka kumutabara.”

Undi nawe ati “Amakimbirane yabo turayazi.Maze nk’umwaka amakuru nyumva ko umudamu ahohoterwa.”

Umunyamabanga Nshingwabikorwa w’Umurenge wa Kimonyi,Mukansano Godence yagiriye inama uyu mugore kugaragaza ikibazo cye mu nkiko kugira ngo umugabo akurikiranwe.

Yagize ati “Inama nagira uwo mudamu  ni atange ikireko hanyuma namara gutanga ikirego kuri RIB dusigare dushakisha uwo mugabo.”Aho tubimenyeye turaza kubikurikirana, tumenye ikibazo.”

Amakuru avuga uyu mugabo akimara gukora ibi byose yahise atoroka kugira ngo adakurikiranwa gusa ubu akaba ari gushakishwa.