Uwendaga kuba Padiri arakekwaho gusambanya umunyeshuri w’umuhungu

Mu karere ka Nyagatare haravugwa inkuru y’umufurere ushinzwe imyitwarire y’abanyeshuri (Animateur) ukekwaho icyaha cyo gusambanya umwana w’umuhungu w’imyaka 17.

Uyu mufurere w’imyaka 36 yatawe muri yombi ku wa 11 Mutarama 2022, mu gihe icyaha akurikiranyweho bikekwa ko yagikoze mu mpera z’umwaka ushize tariki 27 Ukuboza 2021.

Ibi byabereye mu Karere ka Nyagatare, Umurenge wa Nyagatare, Akagari ka Nyagatare, Umudugudu wa Nyagatare ya II.

Umuvugizi wa RIB, Dr Murangira Thierry yatangarije Igihe ko iperereza ry’ibanze ryerekana ko ngo uyu mufurere hari impamvu zifatika zigaragaza ko yahohoteye uyu mwana mu bihe bitandukanye harimo na tariki ya 27 Ukuboza 2021.

Yasoje agira ati “Uwafashwe afungiye kuri Sitasiyo ya RIB ya Nyagatare mu gihe iperereza rikomeje kugira ngo hakorwe dosiye ishyikirizwe Ubushinjacyaha.’’

Aba bombi yaba ukurikiranwe n’uwo bivugwa ko yakorewe icyaha nta numwe imyirondoro ye yashyizwe ahagaragara, bikavugwa ko iperereza rigikomeje.