Kamonyi: barasabwa koza amenyo neza mu rwego rwo kwirinda indwara zo mu kanwa

Ku munsi mpuzamahanga wahariwe ubuzima bwo mu kanwa, abantu baributswa ko ari ngombwa koza amenyo neza kandi hakoreshejwe imiti yabugenewe aho gukoresha ibiti n’ibindi kuko bishobora kwangiza mu kanwa aho kuhabungabunga

Ibi ni ibyagarutsweho kur’uyu wa 24 Werurwe 2024 mu karere ka Kamonyi mu gikorwa cyo kwizihiza umunsi mpuzamahanga wahariwe ubuzima bwo mu Kanwa.

Bamwe mu bitabiriye uyu munsi ndetse banapimwe indwara zo mu kanwa bavuga ko bahawe inama zinyuranye bityo bakaba bagiye kongera uburyo bajyaga bakora isuku yo mu menyo bagamije kwirinda indwara zo mu kanwa.

SIWOMANA James Umuturage wo muri Kamonyi avuga ko yajyaga yoza amenyo rimwe ku munsi ariko akaba yagiriwe inama yo kujya ayoza nibura kabiri ku munsi kugira ngo atazarwara indwara zo mu kanwa.

Agira ati:”Bamaze kunsuzuma, bambwiye ko amenyo yange ari mazima ariko ngo ngomba kujya nyoza mu gitondo na nimugoroba, nanjyaga nyoza rimwe ku munsi none bambwiye ko ngomba kubihindura kandi ngakoresha uburoso n’umuti wabugenewe (Colgate) mu rwego rwo kwirinda kurwara indwara zo mu kanwa”.

Uwingeneye Solange wiga ibijyanye no kubaga amenyo muri Kaminuza y’u Rwanda avuga ko ari igikorwa cyateguwe na RBC n’abafatanyabikorwa bayo hamwe n’ abanyeshuri ba kaminuza y’u Rwanda, hagamijwe kwigisha abaturage batabasha kugera ku baganga b’amenyo bakabigisha ihuriro riri hagati y’ubuzima bwo mu kanwa n’ubuzima bw’umubiri busanzwe mu rwego rwo kugira ubuzima bwiza.

Agira inama abantu yo kujya bakora  isuku yo mu kanwa nyuma y’uko bafashe ifunguro rya mu gitondo n’irya nimugoroba bigakorwa hagati y’iminota 2 n’iminota 3 kandi bakoresheje uburoso n’umuti w’amenyo wa korugati (Colgate).

Asoza asaba abakoresha agati bibwira ko bakora isuku y’amenyo kubireka kuko ngo atari byiza kuko byangiza ishinya kandi kwangiza ishinya bikaba bitera ibibazo by’ahazaza.

MUKABAHIRE Beatha  umukozi  muri SOS muri gahunda  yo gufasha abana bato kugira ubuzima bwiza bwo mu kanwa avuga ko ubutumwa bureba ababyeyi.

Agira ati:” Tuributsa ababyeyi kwita ku bana babo kuko umwana atangira koza amenyo akiyamera, ababyeyi babyiteho barebe ko abana boza amenyo neza, ubusanzwe uburwayi bw’amenyo buri hejuru, ubushakashatsi twakoze mu myaka itatu ishize mu mashuri 13 yo mu Rwanda  bwagaragaje ko 46% by’abana b’abanyeshuri  mu mashuri twakoreyemo bose barwaye amenyo”.

BAGAHIRWA Irene, Umukozi  ushinzwe ibikomere, ubumuga n’indwara zo mu kanwa muri RBC avuga ko ubushakashatsi bwakozwe na RBC muri 2021 ku bantu bari ku myaka 18 kuzamura abantu bageze kuri 57% ntibivuza indwara z’amenyo 11% nibo bivuje amenyo mur’uwo mwaka naho 92,8% bagiye kwivuza aruko umusonga wabarajije ijoro bivuga reko ko ubumenyi bwo kwivuza bukiri hasi cyane”.

BAGAHIRWA akomeza  agira ati:”Turakangurira abantu kwita ku isuku yo mu kanwa ariko banitabira kwisuzumisha uburwayi bwo mu kanwa kugira ngo bamenye uko bahagaze, tunabasaba ko bajya bakora isuku yo mu kanwa boza amenyo bakoresheje uburoso n’umuti urimo Floride nibura kabiri ku munsi nukuvuga mu gitondo na nimugoraba ariko tukibutsa abantu ko mu gihe umuntu afashe amafunguro aba agomba koza amenyo nyuma yo kuyafata”.

Uyu muyobozi asoza asaba abantu kujya  bitabira kwivuza bakita ku isuku yo mu kanwa kuko kubikora neza arugukereza uburwayi bwo mu kanwa ndetse n’izindi ndwara zaturuka kur’izo zo mu kanwa kandi akibutsa ko abaganga bavura indwara zo mu kanwa bahari ku mavuriro yose yo mu gihugu.

Ubushakashatsi bwa RBC bwakozwe muri 2021 kandi bugaragaza ko abantu 86%mu boza amenyo aribo bakoresha umuti w’amenyo bivuze ko abandi bakoresha agati n’ibindi mu gihe 67%boza amenyo rimwe gusa 19% by’ababajijwe nibo boza amenyo kabiri ku munsi .

Umunsi mpuzamahanga wahariwe ubuzima bwo mu kanwa wabereye kur’icyi cyumweru tariki 24 Werurwe 2024 ahazwi nka BISHENYI mu Karere ka KAMONYI ukaba waranzwe n’ibikorwa birimo gusuzuma abantu ku buntu indwara zo mu kanwa no kubaha umuti wo kwiborosa n’uburoso bw’amenyo ku buntu aho uyu munsi wahawe insanganyamatsiko igira iti:”Mu kanwa HAZIMA,UMUBIRI MUZIMA”.